Hoogeveen

We hebt een deel van oes verkiezingsprogramma ok in 't Dreints vertaold. Deur oeze speerpunten en de inleiding ok in de streektaol op te nemen, geve wij an daw het Dreints belangriek viendt. Het is een slim belangriek cultuurgoed en heurt bij de identiteit van de inwoners van ’t Ogeveine. De rest van het programma is allent in 't Nederlands edaone

Waor zitte wij ’t hardst achteran:

Veurof

In oeze samenleving is geld slim belangriek eworden. Geweldig veul meinsen hebt van oeze neoliberale politici te heuren kregen - en bint heur ook gaon geleuven - dat de welvaart in een laand groter wordt as de laandelijke economie gruit.
De SP is het daor niet mit iens. Veul meinsen bint ontevreden umdat ze de maatschappij oneerlijk viendt. Veul veurzienings bint vurtbezunigd en de kaant die het vandaag de dag op giet: elk veur zichzölf. Ja, en dan krieg ie dat paartie meinsen slim riek eworden bint, mar tegeliekertied dat der hiel veul arme lu komen bint. Of iene zich welvarend vuult, hef te maken mit de vraog of e gelokkig is. En gelok hef der veur de mieste meinsen mit te maken of e contact hef mit aandern, of e zich veilig vuult en of e vertrouwen hef in de wereld um hum hen.
Wat de SP angiet, is het welbevienden van de meinsen der de leste jaoren hard op achteruut egaone.
Veur de SP bint drei kerndingen het belangriekst: meinselijke weerdigheid, geliekweerdigheid en solidariteit. Wat betiekent dat veur ’t Ogeveine?

De SP deinkt dat meinsen gelokkiger bint as ze gebruuk maken kunt van veurzienings waor wij mit menare eigenaar van bint. Wij wilt op ’t Ogeveine bibliotheken die goed bereikbaar bint, betaalbare sportclubs, goed verzorgde schoelgebouwen, genog thuuszorg, uutgaonsgelegenheden, jongernwark, buurthuzen waor meinsen menare treffen kunt, een lös plietsiebero, genog betaalbare huzen, genog oldernzörg en hulp veur andere meinsen, die het allent niet redt.

Vanzölf kost al die veurzienings geld. Iene allent kan dat nooit betalen, maor as samenleving kunne wij dat wel. As het belastinggeld goed besteed wordt, kan de levensstandaard van meinsen verbeterd worden. Mit menare kuj zaken betalen die veur iene allent niet op te brengen bint. De SP wil geern dat meinsen zich weer verantwoordelijk vuult veur menare. Dat meinsen menare weer hölpt in de buurt zonder dat het um heur eigen belang giet. De Smederijen viene wij een hiel goed initiatief. Meinsen mut mitbeslissen kunnen over heur umgeving. Wie argens woont, wet zelf ja um ’n besten wat of der speult. Mar het mut dan wel zo weden, dat meinsen ok het gevuul hebt dat der naor heur luusterd wordt en dat der wat mit edaone wordt.

Veul zaken wordt eregeld deur de laandelijke politiek. Toch mut ok een gemiente belangrieke keuzes maken. De SP wil op ’t Ogeveine mithölpen um meinsen gelokkiger te maken deur te zörgen veur veurzienings die een meinse allent niet regeln kan.

In ons verkiezingsprogramma hebt wij oeze standpunten naor underwarp wieder uutewarkt. (In 't Nederlands)